Sesorah

SESORAH

Salah sijining pelajaran bahasa Jawa yaiku bab sesorah. Opo ta sesorah kuwi? Sesorah utawa pidato iku matur ing ngarep klumpukane wong akeh kang disegaja nganggo basa lesan kanti tujuwan kang gumathok. Basane gampang ditampa utawa komunkatif,
nengsemake utawa menarik,prasaja, lan angone negja tembung bener serta cetha.
Opo wae kang dadi pokok-pokoke sesorah kuwi?

Kagunaan Sesorah

1. Menehi Hiburan. Pidhato jinis iki ditindakaké ana ing acara pahargyan. Déné tujuané yakuwi supaya acara iku bisa sumringah lan meriah. Pemicara mung ngandharaké babagan kang gawé seneng lan bungah, uga nganggo basa kang santai lan raket.

2. Menéhi Kawruh. Pidhato iki isiné ngandharake babagan kang sacetha-cethané, supaya pamireng mangerti. Pemicara bisa nganggo conto, mbandingaké, nerangaké, lan liya- liyané kang kabéh mau gunané kanggo njelasaké marang pemirengé.

3. Ajak- ajak. Pemicara ngandharaké alesan, bukti, lan conto supaya pamirengé gelem nindakaké kaya apa kang dikarepaké pemicara. Pidhato iki umumé jinis pidhato kampanye arep pemilhan umum.

Déné miturut kaanané, jinisé pidhato iku uga werna- werna, yakuwi: kaanan resmi, setengah resmi, ora resmi, lan sapanunggalané.

1. Kaanan Resmi. Kanggo kaanan resmi, lumrahé pamicara maca naskah kang wis disiapaké supaya ora salah anggoné pidhato lan naskah iku bisa kasimpen kanggo arsip. Pemicara ora bisa ngandharaké pidhatoné sakarepé dhewe amarga wektune wis diatur.

2. Kaanan Setengah Resmi. Pemicarané bisa ngandharaké pidathoné rada longgar. Nanging, kesan resmi kudu tetep digatekaké.

3. Kaanan Ora Resmi. Pemicara bisa ngandharaké pidhatoné miturut tujuan utawa pemirengé.

4. Kaanan Liya- liyane. Sakliyané kaanan kang wis kaandhraké iku, isih ana kaanan kang uga duweni pengaruh marang cara ngandharake pidhato, yaiku pemirenge lungguh apa ngadeg, wektune esuk apa awan, anggone pidhato dewe apa karo wong liya. Contone, yen pemirenge ngadeg pidhatone kanthi singkt bae.

 Kepriyé carané pidhato kang apik lan kasil bakal dijlentrehaké ing kéné. Wektu Pidhato pemicara iku digatekaké déning kabéh kang rungokaké. Kabéh kang ana ing pemicara saka klambi, rambuté, tekan carané mlaku ing podium digatekaké déning pamirengé. Kepriyé carané ngadeg uga ora luput saka pengamatanné pemireng pidhato iku. Apa kang ora pas saka pemicara bisa dadi bahan panacad déning para pemireng. Panacad iku nyebabaké pidatoné ora kasil kanthi apik.

1. Carané Nganggo Klambi. Klambiné kudu resik, rapi, sopan, lan jumbuh kaliyan kaanané pemireng pidhato iku. Carané nganggo penganggon utawa klambi kudu bener., umpamane: peciné ora miring, dasiné anggoné nalekaké wis bener. Jinisé klambi uga kudu nyesuaiaké karo pemirengé, yén pemirengé nganggo jas pemicarané beciké uga nganggo jas, yén pemirenge nganggo hem lengen dawa becike pemicarane uga nganggo hem lengen dawa.

2.  Carané Ngadeg ing Podium. Sadurungé diwènéhi wektu déning wong kang macakaké pranata adicara, beciké pemicara lungguh ana papan kang rada ndelik. Aja lungguh ana ngarepé pemireng, amarga penampilané mengko ora duwéni kejut. Anggoné mlaku anuju podium kudu kanthi lumrah, ora digawé- gawé. Sadurungé ngomong, ambegan lan nyawang kabéh para pamirengé kanthi sumringah. Anggoné ngadeg kanthi jejeg lan aja nyenderaké awak ing podium.

3. Carané Nggocèki Mikrofon. Mikrofon kang ana standaré ora perlu digocèki bola- bali amarga bisa muni lan brebegi. Déné mikrofon kang ora ana standaré digocèki kanthi lumrah baé. Aja dolanan kabel utawa nggaya kaya penyanyi ing panggung. Mikrofon karo lambé aja kecedaken utawa kadohan.

4. Carané Pidhato. Carané pidhato iku ana papat, yakuwi: maca naskah, ngapalaké,

Patrape wong wasis guneman:

1.Solah bawane kang lumrah, tatag, lan ora kaku.

2.Ndeleng marang wong kang diajak guneman.

3.Nampa panyendu utawa usulan.

4.Solah bawane nengsemake.

5.Lancar gunemane.

6.Angen-angene logis.

7.Mumpuni utawa nguwasani apa kang dirembug.

8.Miwiti anggone micara menawa wis antuk palilah lan swasanane apik.

9.Urmat lan nuwuhake rasa paseduluran sarta ana prenesane utawa geguyone.

10.Gandhang swarane

Kang ora kena ditindakake nalika sesorah:

1.Ngadeg tanpa nggatekake papan panggonan.

2.Ngadeg kanthi lendhehan podium.

3.Ngadeg kaku, utawa kosok baline loyo ora ana greget.

4.Ngadeg kanthi sikil kang rapet, utawa kosok baline kanthi mbegagah.

5.Ngadeg kanthi lelambaran sikil siji.

6.Slaga kang digawe- gawe.

7.Ngguyu kanthi digawe- gawe.

8.Mbesengut.

9.Gugup.

10.Ndhingkluk , utawa kosok baline tansah tumenga(ndangak).

11.Ngobahake awak kanthi ora trep karo kang digunem.

12.Kukur- kukur.

13.Nglebokake tangan ing sak clana.

14.Ora nggatekake kang diajak guneman.

Tuladha sesorah:

Sesorah Atur Pasrah Temanten Kakung

Assalaamu’alaikum Wr. Wb.

Kawula nuwun, kanthi limbaran pepayungan budi rahayu saha hangunjukaken raos suka sukur dhumateng Gusti, “Mugi Rahayuhasagung Dumadi” tansah kajiwa lan kasalira dhumateng kula lan panjenengan sedaya.

Amit pasang aliman tabik, mugi tinebihna ing iladuni myang tulak sarik, dene kawula cumanthaka marak mangarsa hanggempil kamardikan panjenengan ingkang katemben wawan pangandikan, inggih awritipun hamestuti jejibahan luhur kula piniji minangka duta saraya sulih sarira saking panjenenganipun Bapa/Ibu Suharyanto, kula kadhawuhan nglarapaken putra calon temanten kakung, mugi katur panjenenganipun Bapa/Ibu Purwanto.

Panjenengan Bapa Trisnodiharjo ingkang jumeneng hangembani wuwus minangka sulih sarira saking anjenenganipun Bapa/Ibu Purwanto ingkang winantu sagunging pakurmatan. Wondene menggah wigatosing sedya sowan kula wonten ngarsa panjenengan.

Ingkang sepisan, ngaturaken sewu agenging kalepatan dene panjenenganipun Bapa/Ibu Suharyanto boten saged hanindakaken piyambak masrahaken putranipun calon temanten kakung, kapeksa namung saged ngaturaken salam taklim mugi katura ing panjenenganipun Bapa/Ibu Purwanto, ingkang lumantar kawula. Sanget ing pamujinipun, bilih anggenipun mngku karya hanetepi darmaning asepuh, hangrakit sekar cepaka mulya, hamiwaha putra mahargya siwi, tetepa winengku ing suka basuki.

Jangkep kaping kalih, rehning putra calon temanten kakung pun Bagus Ahmad Adnan, atmaja kakung saking Bapa/Ibu Suharyanto ingkang pidalem ing Wirobrajan Gamping Sleman Ngayogyakarta, sampun kalampahan ijab/dhaup suci kaliyan Rara Wiwin Safitri, Kenya siwi saking panjenenganipun Bapa/Ibu Purwanto, kala wau dinten Jum’at Pahing surya kaping 11 November 2011 wanci tabuh 09.00 mapan ing dalem Imogiri Bantul Ngayogyakarta mriki, kanthi nirbaya nir wikara boten wonten alangan satunggal punapa.

Sarehning sampun ndungkap titiwanci tumapaking gati, pramila calon temanten kakung kula pasrahaken, mugi tumanten katindakna dhaup panggihing temanten, anut satataning adat widhiwidana ingkang sampun lumampah wonten ing Imogiri Bantul Ngayogyakarta. Kula sapangombyong tansah jumurung ing karsa, sinartan puji donga mugi Gusti tansah ngijabahi dhumateng temanten sarimbit, anggenipun amangun brayat enggal, tansah manggih guyup rukun, atut runtut, ayem tentrem, rahayu ingkang tinuju, bagya mulya ingkang sinedya.

Dene ingkang wekasan, sasampunipun paripurnaning pahargyan, kula sarombongan pangombyong temanten kakung, keparenga nyuwun pamit saha nyuwun pangestu, mugi-mugi lampah kawula sarombongan manggih wilujeng kalis saking pringga bayaning marga.

Semanten ugi, hambok bilih anggen kawula minangka talanging basa wonten gonyak-ganyuking wicara, kiranging subasita ingkang singlar ing reh tata krami, kawula tansah nyuwun lumunturing sih samodra pangaksami.

Akhirul kalam, billahi taufik wal hidayah,

Wassalaamu’alaikum Wr. Wb